Brenda katër muajve volumi i punimeve për zgjerimin e autostradës Tiranë-Durrës ka arritur në 25%. Zv/kryeministrja Belinda Balluku gjatë inspektimit cilësoi si pozitive kryerjen e deritanishme të këtyre punimeve.
Balluku tha se me ndërtimin e rrugës Kashar-Lekaj si pjesë e Korridorit Blu do të ketë një lehtësim të trafikut rrugor.
“Kemi 6 kilometra, nga mbikalimi i ‘Casa Italia’ deri tek mbikalimi i Kasharit, të cilat zgjerohen për ta çuar këtë autostradë në një autostradë të kategorisë A. Puna jonë konsiston në këto momente në shtimin e dy korsive në secilën karrexhatë. Kemi 3.75 metra korsinë dhe në krahun tjetër dhe pastaj kemi dhe korsitë e emergjencave nga 3 metra secila”, tha Balluku.
Avancimi i punimeve nuk ka sjellë problematika lidhur me lëvizjen e automjeteve, ndërsa synohet që kjo vepër, ashtu sikundër edhe shumë projekte të tjera, të përfundojë përpara afatit, duke lehtësuar ndjeshëm lëvizjen nga kryeqyteti drejt Durrësit apo edhe anasjelltas.
“Shpresojmë që, jo vetëm të dorëzohet në afat, por edhe para afatit. Duket që gjithçka po ecën mirë. Nuk kemi problematika me trafikun. Unë jam e sigurtë që drejtuesit e automjeteve do tregonin mirëkuptim, por në çdo rast është menaxhuar shumë mirë nga ARRSH-ja dhe nga kontraktorët”, nënvizoi Balluku.
Zgjerimi i autostradës Tiranë-Durrës pritet të lehtësojë ndjeshëm qarkullim e automjeteve mes kryeqytetit dhe qytetit bregdetar, veçanërisht gjatë sezonit veror.
