Kreu i SPAK, Altin Dumani ka reaguar pas akuzave të bëra nga ish-kryeministri Sali Berisha, i cili e quajti mercenar të paguar të Edi Ramës, që mbron sipas tij vëllain e kryeministrit nga hetimi për dosjen “Xibraka”.
Përmes një reagimi zyrtar, Dumani thotë se në BKH nuk ka shkuar asnjë letër, kallëzim apo denoncim nga shtetasi i pretenduar si Zaho Koka.
“Në përgjigje të interesit tuaj: Nisur nga deklarata e bërë në media, Drejtuesi i Prokurorisë së Posaçme kundër Korrupsionit dhe Krimit të Organizuar, Z. Altin Dumani i është drejtuar Drejtoreshës së Byrosë Kombëtare të Hetimit (BKH) përmes një shkresë më dt.13.01.2025, për të bërë verifikimet e nevojshme, nëse është dërguar në BKH ndonjë shkresë nga shtetasi i përmendur si Zaho Koka, ku jepet informacion për shtetasin Ols Rama, si edhe rrëmbimin e një biznesmeni me inicialet V.B. Ai ka kërkuar gjithashtu të informohet nëse kanë përfunduar verifikimet e kryera dhe cila është procedura. Më datë, 14.01.2025, Drejtoresha e Byrosë Kombëtare të Hetimit, përmes një shkresë sqaroi se: Nga verifikimet e kryera në Sekretari, Protokoll rezulton se në Byronë Kombëtare të Hetimit nuk ka ardhur letër, kallëzim apo denoncim nga shtetasi i pretenduar si Zaho Koka”, thuhet në reagimin e tij.
