Prokuroria e Lezhës ka dhënë pretencën në lidhje me përplasjen me armë të ndodhur në muajin Prill të vitit 2022 në fshatin Kallmet, ku ish-kreu i Njësisë Administrative, Besnik Simoni u përfshi në një përplasje me armë me bashkëfshatarin e tij, Altin Marku.
Sipas tvklan, mësohet se për Besnik Simonin është kërkuar deklarimi fajtor dhe dënimi me 12 vite burg, për veprat penale “Vrasja në kapërcim të kufijve të mbrojtjes së nevojshme” dhe “Mbajtja pa leje dhe prodhimi i armëve, armëve shpërthyese dhe municionit”.
Kujtojmë se Besnik Simoni dhe Altin Marku u konfliktuan me armë në fshatin Kallmet pas një konflikti verbal, ku zënka degjeneroi deri në përdorimin e armëve, duke mbetur të dy të plagosur.
Zyrtarisht policia ka thënë se ngjarja u regjistrua pas një sherri që dyshohet të ketë nisur në zyrën e Njësisë Administrative mes Simonit dhe Markut.
Ky i fundit dyshohet se pas konfliktit verbal, e ka ndaluar në rrugë zyrtarin dhe më pas e ka qëlluar atë disa herë.
