Reperi shqiptar, Rigels Rajku, i njohur me emrin e artit “Noizy”, është vetëdorëzuar në stacionin e policisë në Pejë.
Lajmi u konfirmuar për mediat kosovare nga zëdhënësi i policisë për rajonin e Pejës, Fadil Gashi, i cili tha se Noizy aktualisht është duke u marrë në pyetje.
“Rreth orës 10:30, ai erdhi me avokatin e tij dhe është vetëdorëzuar. Po intervistohet dhe Prokurori është njoftuar për këtë rast,” tha Gashi.
Po ashtu, zëdhënësi i Prokurorisë Themelore në Pejë, Shkodran Nikçi, bëri të ditur se Noizy do të mbahet nën arrest për 48 orë.
“Ka bërë vetëdorëzim. Ai po intervistohet nga hetuesit policorë dhe do të ndalohet për 48 orë,” shpjegoi ai.
Noizy dyshohet se ka qenë i përfshirë në një incident të dhunshëm në një klub nate në Pejë. Disa ditë më parë, reperi tjetër i njohur, Stresi, gjithashtu u vetëdorëzua në polici, por u lirua pas pagimit të një garancie prej 20 mijë eurosh.
