Më shumë se 75 milionë amerikanë kanë votuar më herët në zgjedhjet presidenciale në SHBA. Shifrat nga gjurmuesi i Laboratorit Zgjedhor të Universitetit të Floridës tregojnë se 75.093.872 njerëz kanë votuar me postë ose personalisht në qendrat e votimit.
Këtë cikël zgjedhor presidencial, më shumë votues zgjodhën të votojnë personalisht në qendrat e votimit sesa me postë. Numri i votuesve të regjistruar në SHBA është rreth 168 milionë, ndryshe nga viti 2020 kur SHBA-ja ishte në mes të pandemisë së koronavirusit COVID-19.
Kandidatja demokrate presidenciale, Kamala Harris dhe rivali i saj republikan, Donald Trump, mbajtën mitingjet e fundit në shtetet jugore më pak se dy ditë para ditës së zgjedhjeve.
Harris mbajti një miting në Atlanta në shtetin Georgia dhe mori pjesë në një ngjarje në në Charlotte në Karolinën e Veriut, ndërkohë Trump mbajti miting në Gastonia në Karolinën e Veriut, më pas udhëtoi në Salem në Virxhia, para se të kthehej në Greensboro në Karolinën e Veriut.
Gjatë tubimit të saj në shtetin Georgia, Harris tha se Trump është i fokusuar në “listën e tij të armiqve” dhe theksoi se ajo do të fokusohet në “listën e saj për të bërë”.
“Ky nuk është dikush që po mendon se si ta bëjë jetën tuaj më të mirë. Ky është dikush që është gjithnjë e më i paqëndrueshëm, i fiksuar pas hakmarrjes, i konsumuar nga ankesa dhe ai ka dalë për pushtet të pakontrolluar”, tha kandidatja demokrate.
Trump, në tubimin e tij, vuri në shënjestër pretendenten e tij, duke theksuar se ai do të sjellë një epokë të artë amerikane.
“Kamala e prishi, unë do ta rregulloj dhe Amerika sërish do të bëhet e pasur”, tha ai në Gastonia.
Ndërkohë, siç raportoi CNN duke cituar një burim të panjohur, Harris pritet t’i bashkohet programit televiziv ‘Saturday Night Live’ në New York City.
Sondazhet tregojnë se Harris dhe Trump janë të bllokuar në një “finish të njëkohshëm”, veçanërisht në shtatë shtetet kritike të fushëbetejës.
Shtetet e fushëbetejës janë thelbësore sepse SHBA-ja nuk i zgjedh drejtpërdrejtë presidentët e saj. Në vend të kësaj, procesi zhvillohet përmes Kolegjit Zgjedhor, ku 538 përfaqësues votojnë në përputhje me rezultatet e shteteve të tyre.
Një kandidat duhet të sigurojë 270 vota të Kolegjit Zgjedhor për të shpallur fitoren. Zgjedhësit ndahen në shtete bazuar në popullsinë e tyre dhe shumica e shteteve i japin të gjithë elektorët e tyre cilitdo kandidat që fiton shtetin në votimin e përgjithshëm.
