Rreth 200 raketa janë lëshuar nga Irani në drejtim të Izraelit mbrëmjen e sotme gjatë sulmit që erdhi si hakmarrje për fushatën e Tel Avivit kundër grupit Hezbollah në Liban.
Teksa sirenat e luftës vijojnë të bien në Jerusalem dhe Tel Aviv, informacioni për numrin e raketave të lëshuara është konfirmuar nga Forca e Sigurisë së Izraelit (IDF).
Sipas radios së ushtrisë izraelite, u lëshuan rreth 200 raketa, ndërsa ishin marrë masat që të gjithë civilët të ndodheshin në strehimore për bomba.
Raketa sakaq janë parë duke fluturuar mbi Jordaninë qendrore, ndërsa të shtëna të forta të vazhdueshme të armëve janë dëgjuar në Bejrut gjatë sulmit iranian.
Dëshmitarët i thanë Reuters se panë dhjetëra raketa që fluturonin mbi Jordaninë qendrore dhe agjencia shtetërore e lajmeve të vendit njoftoi mbylljen e përkohshme të hapësirës së saj ajrore. Sakaq, ushtria jordaneze u bëri thirrje qytetarëve të saj që të qëndrojnë në shtëpitë e tyre për sigurinë e tyre.
Ndërkohë nga televizioni shtetëror iranian pohojnë se 80% e mbi 200 raketave të lëshuara në Izrael goditën objektivat e tyre. Megjithatë, Forcat e Mbrojtjes izraelite kanë thënë se “nuk janë në dijeni” për ndonjë lëndim nga sulm.
Burime nga ushtria siriane kanë thënë se mbrojtja ajrore izraelite ka rrëzuar gjithashtu dhjetëra raketa që fluturuan mbi Sirinë jugore.
Mediat izraelite kanë raportuar së fundmi se është rihapur edhe hapësira ajrore e vendit pas sulmit iranian. Zëdhënësi i IDF, Daniel Hagari tha se “për momentin nuk ka kërcënime të mëtejshme ndaj Izraelit nga Irani”, gjë që tregon se sulmi me raketa ka përfunduar, ndërsa qytetarët u paralajmëruan se mund të largohen nga strehimoret.
