Deputetja e PD-së, Dhurata Çupi i është përgjigjur ministrit të Brendshëm, Ervin Hoxha i cili i quajti të papranueshme veprimet e opozitës gjatë seancës së djeshme në Kuvend.
Përmes një reagimi në rrjete sociale, Çupi shkruan se dikush duhet t’i thotë ministrit të Brendshëm se ky Parlamenti ynë mjeran nuk ka lidhje me demokracinë.
Sipas saj, Parlamenti është tempulli i Edi Ramës prej nga sundon kundër interesit të Shqipërisë.
“Dikush duhet t’i thotë Ministrit të Brendshëm se ky parlamenti ynë mjeran nuk ka lidhje me demokracinë. Partia Socialiste qendron në pushtet, sepse Edi Rama investoi paratë e korrupsionit, ndërsa krimi i organizuar investoi paratë e drogës. Parlamenti është tempulli i Edi Ramës prej nga sundon kundër interesit të Shqipërisë, që u ka hequr me dhunë të drejtën e votës, ka arrestuar liderin e opozitës dhe ka burgosur kundërshtarin politik, ka shkatërruar me mijëra hektarë pronë publike dhe private për interesa korruptive private, i ka dhënë krimit të organizuar ekonomië në dorë dhe tani ka menduar të copëtojë edhe shtetin shqiptar.
Këto janë krimet që duhet ta shqetësojnë Ministrin e Brendshëm, sepse këto krime ngjajnë shumë me pushtetin e atyre forcave antidemokratike në Europën e së shkuarës! Europianët modernë nuk e pranojnë diktaturën, nuk pranojnë që shteti i së drejtës të zëvendësohet nga urdhrat e kryeministrit. Ne do të protestojmë njësoj siç protestojnë gjermanët, francezët, anglezët dhe çdo europian që e ka të shtrenjtë lirinë dhe dinjitetin njerëzor!”, shkruan Çupi.
