Çdo 1 Tetor festohet “Dita Ndërkombëtare e Personave të Moshuar” për të nderuar dhe vlerësuar kontributin e tyre në shoqëri.
Kryebashkiaku i Tiranës Erion Veliaj, ka uruar të gjithë gjyshërit dhe gjyshet përmes një videomesazhi, duke shprehur mirënjohje për kontributin e çmuar që ata kanë dhënë dhe japin në shoqëri.
Kryebashkiaku rikujtoi se duke nisur nga 1 Janari, pensionistët e Tiranës do të udhëtojnë falas me autobus, në mënyrë që ata të kenë më shumë mundësi për të shijuar qytetin.
“Përshëndetje të gjithëve, gëzuar 1 Tetorin, festën e gjyshërve dhe gjysheve. Gëzuar të gjithë pensionistëve dhe të gjithë moshuarve, të gjithë atyre që na kanë dhënë kaq dashuri, kaq shumë pasion dhe që kanë punuar kaq shumë për këtë vend dhe familjet tona. Nga data 1 Janar të gjithë pensionistët, gjyshet dhe gjyshërit e Tiranës do të udhëtojnë me abone falas. Ndaj duam tu urojmë të gjithëve gëzuar festën. Ju kemi shumë xhan”,-tha Veliaj në videomesazh.
