Drejtori i FBI-së, Christopher Wray, po dëshmon të mërkurën në një seancë në Kongres mbi hetimin e byrosë lidhur me atentatin ndaj ish-presidentit Donald Trump. Ligjvënësit pritet t’i kërkojnë atij detaje të reja mbi motivin dhe të kaluarën e autorit të sulmit.
Seanca në Komisionin Juridik të Dhomës së Përfaqësuesve është hera e parë që zoti Wray flet në detaje mbi ngjarjen, ndërsa agjentët vazhdojnë të kryejnë hetime mbi 20-vjeçarin Thomas Matthew Crooks.
Atentati ishte përpjekja më e rëndë për të vrarë një president apo kandidat presidencial në Shtetet e Bashkuara, që kur u sulmua presidenti Ronald Reagan në vitin 1981.
Seanca ishte planifikuar shumë përpara sulmit ndaj ish-Presidentit Trump më 13 korrik, në kuadër të mbikëqyrjes rutinë mbi FBI-në dhe Departamentin e Drejtësisë nga Komisioni, por pyetjet rreth atentatit po dominojnë.
Megjithëse FBI nuk është vënë në shënjestër me të njëjtin intensitet sa Shërbimi Sekret lidhur me dështimet e masave të sigurisë për mbrojtjen e ish-Presidentit Trump, ligjvënësit ka të ngjarë të bëjnë pyetje të shumta lidhur me vlerësimin e FBI-së se Crooks nuk la pas ndonjë motiv të dukshëm ideologjik për veprimet e tij.
Të martën pas kritikave të ashpra si nga republikanët ashtu edhe demokratët, drejtorja e Shërbimit Sekret Kimberly Cheatle dha dorëheqjen.
FBI ka thënë se po e heton ngjarjen në Batlër të Pensilvanisë, nga e cila gjeti vdekjen një pjesëmarrës në tubim dhe dy të tjerë u plagosën rëndë, si një akt terrorizmi të brendshëm dhe tentativë për vrasje.
Zoti Wray dhe zyrtarë të tjerë të lartë informuan privatisht anëtarët e Kongresit javën e kaluar, duke u thënë se Crooks kishte në telefonin e tij fotografi të ish-Presidentit Trump dhe Presidentit Joe Biden, si edhe zyrtarëve të tjerë. Ai kishte kërkuar gjithashtu në internet datat e Kuvendit Kombëtar Demokrat si edhe të aktiviteteve të fushatës së zotit Trump.
Një zyrtar i zbatimit të ligjit tha për Associated Press javën e kaluar se Crooks kishte lëshuar gjithashtu një dron mbi vendin e tubimit përpara sulmit, mesa duket në një përpjekje për të krijuar një ide për skenën./VOA
