Sulmuesi i Spanjës, Joselu, tha në një deklaratë për mediat se shpreson që të premten Toni Kroos të luajë ndeshjen e fundit të karrierës së tij. Gjermania dhe Spanja përballen për një biletë për në gjysmëfinalet e Euro 2024 dhe Joselu nuk humbi rastin të thumbonte ish-shokun e skuadrës.
“Sa i përket Tonit, duhet të besojmë te vetja, nuk na intereson për lojtarët e tjerë të skuadrave të tjera. E dua Tonin. Por mendoj se të premten është ndeshja e fundit për Tonin”, tha Joselu në konferencë për mediat.
“Mendoj se është një çerekfinale e një Kampionati Europian kundër një skuadre të madhe. Mendoj se Gjermania është gjithashtu favorite për ta fituar këtë titull, por le të shpresojmë që ta nxjerrim në pension Tonin të premten”.
Sfida madhe luhet të premten në orën 18:00 në Shtutgart. 34-vjeçari Kroos deklaroi në fund të sezonit, kur fitoi trofeun e gjashtë personal të Champions League dhe të pestin me Real Madrid, se do të tërhiqej nga futbolli i luajtur pas Europianit. Ai u rikthye disa muaj më parë në Kombëtare pasi ishte larguar më parë prej saj dhe me përfshirjen e tij në skuadër, Gjermania ndryshoi lojën dhe rezultatet.
