Deputeti Enkelejd Alibeaj ka dorëzuar sot në Kuvendin e Shqipërisë kërkesën për mos të qenë pjesë e Grupi Parlamentar të PD-së.
Një gjë të tillë Alibeaj e komunikoi disa ditë më parë përmes një reagimi, ku shprehej se nuk pranonte të ishte pjesë e një grupi të drejtuar nga Sali Berisha.
Në kërkesën depozituar në Parlament, Enkelejd Alibeaj ka kërkuar që të cilësohet si deputet jashtë grupeve parlamentare.
Kërkesa:
Tiranë më, 24/06/2024
Enkelejd Alibeaj, deputet i Parlamentit të Republikës së Shqipërisë, anëtar i Grupit Parlamentar të Partisë Demokratike
DREJTUAR: Kryetares së Kuvendit të Republikës së Shqipërisë
BAZA LIGJORE: Nenet 15 pika 8 dhe 17/1 të Rregullores së Kuvendit të Republikës së Shqipërisë (miratuar me vendimin nr. 166, datë 16.12.2004, e ndryshuar).
E nderuar Kryetare e Kuvendit,
Në mbështetje të nenit 15 pika 8 e Rregullores së Kuvendit të Republikës së Shqipërisë, Ju njoftoj për largimin tim nga Grupi Parlamentar i Partisë Demokratike. Për këtë shkak, e sapo Ju, të bëni njoftimin në seancën parlamentare më të parë, pozicioni im, në kuadër të organizimit të brendshëm të Kuvendit, do të jetë ai i “Deputetit jashtë grupeve parlamentare”. Ky deklarim imi, përfshin edhe rishikim të pozicioneve përfaqësuese, politike dhe administrative të mia, brenda strukturimit të deritanishëm të Kuvendit.
Në zbatim të procedurave të brendshmë organizative që duhen ndjekur sipas nenit 17/1 të Rregullores, mbetem në pritje të përmbushjes së detyrimeve Tuaja dhe administratës së Kuvendit, lidhur edhe realizimin e të drejtave e mia për pjesëmarrjen në strukturat e Kuvendit, përkatësisht në komisionet e përhershme, nënkomisionet, komisionet e posacme, grupet e miqësisë, delegacionet e përkohëshme apo struktura të tjera.
Kjo është një vendimarrje personale dhe politike, e marrë në zgjedhje dhe vullnet të lirë, dhe si e tillë kërkoj nga ana Juaj njoftim e saj në seancën më të parë plenare.
Duke ju falenderuar paraprakisht për bashkëpunimin!
Me respekt
Deputeti
Enkelejd Alibeaj
