Këshilli i Lartë i Prokurorisë, zgjodhi Mirela Bogdanin kryetare të re. Bogdani ishte e vetme në garë dhe u votua 10 vota pro. Pasi prezantoi platformën e saj dhe iu përgjigj pyetjeve të anëtarëve të KLP, në fund të gjithë vlerësuan kandidaturën e saj.
Mirela Bogdani premtoi se në krye të KLP-së do të bashkëpunojë me ndërkombëtarët dhe do të bashkërendojë me institucionet e tjera me drejtësinë.
“Për mua është tepër e rëndësishme puna me partnerët ndërkombëtarë, që kanë insistuar punën e Këshillit të Lartë të Prokurorisë dhe kanë vijuar mbështetjen. Do të vijoj punën me të gjitha institucionet e tjera të drejtësisë. Do të punoj për rregullimin e infrastrukturës të zyrave të KLP. Një fokus tjetër do të jetë bashkëpunimi me KLGJ, bashkëpunimi me Inspektorin e Lartë të Drejtësisë dhe me shkollën e magjistraturës”,-tha Bogdani.
Bogdani merr drejtimin e KLP duke zëvendësuar në këtë detyrë Alfred Ballë, i cili u shkarkua nga Komisioni i Posaçëm i Apelimit dhe u përjashtua me 15 vite nga sistemi i drejtësisë.
