Në një kohë kur në Shqipëri të shumtë janë ata që mëndojnë se është vështirë të gjesh fushën që mund të quhet biznesi i të ardhmes, një prej sipërmarrësve më të sukseshëm në rajon duket se i ka shumë të qarta idetë e tij. Për Samir Manen, kjo industri është turizmi.
Në një intervistë për median, Presidenti i Grupit Balfin tregon se udhëtimi i tij nga student në sipërmarrës është i mbushur me sfida, me vendime të guximshme, me shumë përkushtim e mbi të gjitha me pasionin dhe vizionin për të shkuar larg, dhe për të kontribuar në shoqëri përtej biznesit.
“ Do të ketë gjithmonë njerëz që do të duan të udhëtojnë dhe të bëjnë pushime cilësore me standarde, ndaj edhe ne në BALFIN e kemi në fokus këtë sektor. Ajo që na diferencon është se bëjmë një studim shumë të mirë tregu dhe marrim vendime të menduara shumë mirë se ku do të investojmë. Green Coast për shembull është një ndër projektet ku ne po investojmë 1 miliard Euro. Ky është një ndër projektet më të mëdha në turizëm në gjithë Ballkanin Perëndimor dhe njëkohësisht projekti më elitar në Shqipëri”, ka thënë Mane për Business Magazine.
Samir Mane rrëfen edhe një prej sfidave me të cilat u përball kur vendosi të kthehej.
“Në fakt, jam përballur që në fillim me nje sfidë të madhe; hapjen e QTU-së. Pasi kisha ndërtuar një kompani në Austri ku kam punuar për rreth 14 vjet u ktheva për të ndërtuar të parën qendër tregtare në Shqipëri dhe duhet të isha këtu. Të gjitha studimet e tregut tregonin që ishte një investim i pasigurt, pasi shqiptarët nuk ishin mësuar me qendrat tregëtare duke pasur supermarkete apo markete kudo. Edhe miqtë e mi ishin skeptikë e madje mes tyre edhe babai im më thoshte që të mos e ndërmarr këtë hap, se njerëzit nuk janë mësuar të shkojnë në qendra tregtare për pazare. Por me të gjithë kundër i besova intuitës sime dhe rezultoi një sukses i jashtëzakonshëm. 200 mijë njërëz mbushën QTU-në që në ditën e parë të hapjes. Ishte e pabesueshme”, thotë Mane.
Mane thotë se gjithnjë ka dashur të merret me biznes. “Besoj se kam patur një intuitë biznesi që i vogël kur ndihmoja mamanë në dyqanin ku punonte. Më vonë kam parë mundësinë për të bërë biznes dhe e kam kapur. Patjetër që nuk e prisja që të kisha këtë sukses. Dhe nuk e mendoj që talenti apo intuita ka rolin kryesor në suksesin tim.
Talenti është 10 përqind dhe të jeni të sigurt që pjesa tjetër është përkushtim, punë ditë pas ditë, besim se do ja dalim me misionin për të bërë dyfish më mirë çdo vit. Nëse do quhej talent do thoja se kam talentin për të sfiduar përherë veten. Është sfidë që nuk mbaron as sot as nesër”, thotë Mane, ndërsa shton se suksesi nuk është produkt i një dite të vetme, por përmes punës në mënyrë sistematike përditë. “Kam arritur deri këtu me punë dhe e di se vetëm kështu mund të arrij objektivat që i vendos vetes, Grupit BALFIN dhe kompanive të grupit. Punoj 10-12 orë në ditë me një pushim dreke kryesisht në zyrë. Nuk jam mësuar të bëj ndryshe. Asnjëherë nuk do rresht së punuari”, thotë Mane.
