Të ruash dhe të kontrollosh me kamera biznesin apo shtëpinë është kthyer në mani për një pjesë të shoqërisë.
Kamerat sot janë ngado, në lokale, hyrje pallatesh, nëpër rrugë.
Është çështje e sigurisë, por kjo mani nxorri në pah edhe disa anë negative të përdorimit të teknologjisë për mbikëqyrje brenda familjeve.
Brenda pak ditësh, në Janar dhe Shkurt, policia zbuloi dy raste me dy burra që monitoronin me kamera bashkëshortet e tyre dhe u kufizonin lirinë.
“Mania për të kontrolluar me kamera gjithçka, përfshirë edhe familjarët sipas sociologëve flet për frikë dhe pasiguri në marrëdhëniet me njëri-tjetrin”, raportoi gazetarja Dorina Halili.
“Për fat të keq disa familje po kthehen në burgje shtëpiake, madje në burgje të sigurisë së lartë. Janë shtuar fashat e xhelozisë, mendojnë që nëpërmjet kamerave mund të sigurojnë familjet. Shprehje e një çrregullimi social”, tha sociologu Gëzim Tushi.
Sociologët thonë se kontrolli nëpërmjet kamerave po shtohet bashkë me shtimin e pasigurive të shoqërisë.
“Shoqëria shqiptare është bërë shoqëri e pasigurive të mëdha, e dyshimeve të mëdha, e skepticizmit të madh. Fakti që është rritur frika dhe shtuar pasiguria do të thotë që janë shtuar fenomene të tjera”, tha Tushi.
Një operacion i policisë vitin e kaluar zbuloi se me qindra kamera ishin vendosur nëpër rrugët e vendit edhe nga grupet kriminale, të cilat monitoronin si lëvizjet e policisë, ashtu edhe ato të bandave rivale.
Sociologët thonë se me zhvillimin marramendës të teknologjisë, kontrolli me kamera do të zgjerohet dhe shoqëria do të jetë gjithnjë e më e monitoruar, qofte kjo në mënyrë të ligjshme apo të paligjshme, aq sa çdokush mund të vëzhgojë gjithkënd, për ta kontrolluar apo për t’u mbrojtur.
“Teknologjia shihet si një mjet mbrojtës, po bëhemi të gjithë të kontrolluar”, tha sociologu./Tvklan
