Ministri i Brendshëm, Taulant Balla ka bërë të ditur se në Shqipëri janë kryer 35 vrasje gjatë vitit 2023.
Në analizën vjetore Balla theksoi se kjo shifër tregon për një ulje të numrit të vrasjeve në krahasim me vitet e mëparshme.
Por një tregues i keq është fakti që nga 35 vrasje, 11 prej të cilave janë krim në familje.
E në këtë aspekt, ministri i Brendshëm kërkoi të bëhet më shumë punë nga drejtoritë dhe komisariatet e policisë për krimet e policisë dhe dhunën me bazë gjinore.
“Gjatë vitit 2023, janë zhvilluar 1198 operacione policore, 62 prej të cilave në bashkëpunim me partnerët ndërkombëtar.
Janë marrë masa 7845 shtetas autor të krimeve të ndryshme. Janë goditur 47 grupe kriminale, me veprimtari në kultivim, prodhon, trafikim, shpërndarje te lendeve narkotike, apo edhe pjesë e grupeve kriminale të përfshirë në vrasje.
Sa i përket vrasjeve kemi pasur një rënie drastike, krahasuar me një vit më parë. Kemi 35 vrasje, krahasuar me 107 me vitin 2013 dhe 124 me vitin 2012.
11 prej tyre janë krim në familje, sikurse ishte edhe ngjarja e sotme në Tiranë.
35 është një numër që Shqipëria nuk e ka pasur asnjëherë. I kam kërkuar Drejtorisë Vendore të Policisë, një dorë të hekur kundër dhunës me bazë gjinore dhe një mbështetje të vecante për viktimat e dhunës.
Gjatë vitit 2023, 4698 raste të dhunës në familje, 783 autorë në pranga, 1047 të tjerët është vendosur të procedohen në gjendje të lirë.
Kjo është një situatë e papranueshme dhe që këtu nuk mjafton vetëm policia, duhet një ndërgjegjësim i shoqërisë sonë për parandalimin e këtij fenomeni.
Gjatë vitit 2023, është rritur forca parandaluese, janë parandaluar 67 ngjarje të rënda kriminale dhe unë mendoj se kjo do të jetë sfida e re e Policisë së Shtetit”, theksoi Balla.
