Policia ka arrestuar dy shtetas që dyshohen se janë përgjegjës për aksidentimin për vdekje të 35-vjeçarit në qytetin e Durrësit.
Uniformat blu bëjnë me dije se kanë vënë në pranga shtetasit me iniciale E. M., 33 vjeç, me detyrë drejtues teknik i firmës; dhe B. M., 42 vjeç, drejtues i vinçit nga i cili ra shtetasi A. L., 35 vjeç, i cili për pasojë humbi jetën.
“Në lidhje me informacionin paraprak të ditës së djeshme, për një shtetas që humbi jetën duke punuar, ju bejmë me dije se:
Specialistët për Hetimin e Krimeve të Stacionit të Policisë Plazh, në vijim të veprimeve hetimore të kryera në drejtimin e Prokurorisë, për këtë ngjarje të ndodhur në lagjen nr.13, ku humbi jetën punonjësi i një firme që kryen punime për ndërtimet e pedonales në këtë zonë, i cili po priste degët e palmëve, pa lejen e organeve kompetente, arrestuan në flagrancë për veprën penale “Shkelja e rregullave të mbrojtjes në punë”, shtetasit:
E.M., 33 vjeç, banues në Tiranë, me detyrë drejtues teknik i firmës;
B.M., 42 vjeç, banues në Durrës, drejtues i vinçit nga i cili ra shtetasi A. L., 35 vjeç, banues në Tiranë, i cili për pasojë humbi jetën”, tha policia.
Materialet i kaluan Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme.
