Në mbyllje të Samitit të Procesit të Berlinit, kryeministri Edi Rama tha se vendi ynë nuk është pjesë e rrugës së Ballkanit që përdorin Emigrantët nga Lindja e Mesme.
Në konferencën e përbashkët me kancelarin gjerman Olaf Scholz dhe presidenten e Komisionit Europian, Ursula Von Der Leyen, Rama theksoi se pavarësisht ndihmës që Shqipëria ka dhënë ndër vite për emigrantët, duhet të përcaktohen rregulla të qarta në lidhje me këtë çështje.
“Ne nuk jemi pjesë e rrugës së Ballkanit që përdorin Emigrantët nga Lindja e Mesme prandaj nuk kemi shumë për të dhënë nuk kemi shumë problematikë, por gjithsesi jemi këtu gjithmonë gati për të ndihmuar. Shqipëria është një nga vendet që ka mbrojtur hebrenjtë gjatë Luftës së Dytë Botërore dhe nuk tradhtuam asnjë familje hebreje dhe madje i mbajtëm në shtëpitë tona. Kemi ofruar ndihmë edhe ndaj shqiptarëve në Kosovë kur i largoi ushtria serbe me dhunë, të cilëve iu bë gjenocid nga regjimi i Millosheviçit. Pastaj kemi pritur afganët, pasi u mor pushteti nga talebanët. Jemi të gatshëm ta bëjmë këtë edhe në të ardhmen. Duhet të përcaktojmë rregulla të qarta në lidhje me këtë çështje. Shikojmë një hartë ku gjeografikisht vendet janë të rrethuara nga BE, por nuk janë pjesë e BE-së. Janë në BE jo ligjërisht, por të rrethuara nga vendet e BE-së”, tha Rama./Opinion.al
