Është shtyrë për një tjetër datë gjyqi për Laert Haxhinë, autor i dyshuar i masakrës së Lushnjës.
Seanca e radhës pritet të mbahet më 19 tetor, ndërkohë që në sallën e gjyqit këtë të enjte pati shumë debate.
Prokurorja e SPAK Doloreza Musabelliu, e cila është marrë në mbrojtje nga policia, për shkak të kërcënimeve, është paraqitur në seancën kundër Haxhiut.
Në seancë pati debate mes palëve pasi Laert Haxhiu, sipas news 24, ka refuzuar që të marrë dijeni për seancën e sotme nëpërmjet oficerit të kontaktit. Fillimisht ka pretenduar se është i sëmurë me covid dhe më pas ka refuzuar takimi me agjentin.
Mësohet gjithashtu se avokati Detar Hysi refuzoi që të vijonte mbrojtjen, pasi pretendon se është i zgjedhur nga familjaret dhe jo nga vetë Haxhiu.
Avokati tha se nuk mund të mbrojë një person, i cili nuk i ka dhënë tagrin sepse tashmë sipas tij kanë ndryshuar kushtet ligjore duke qene se Laert Haxhiu ka një adresë dhe duhet të vendosë vetë për avokatin.
Trupa gjykuese e kryesuar nga Erjon Çela vendosi që të mos e pranoj kërkesën e avokatit. Togat e zeza bën me dije se gjykimi do të vazhdojë në mungesë pasi nuk mund të presin pambarimisht Laert Haxhiu, i cili refuzon që të marre dijeni për procesin në vendin tonë.
Ndërkohë, seanca gjyqësore u shty me pretendimin se nuk u bë i mundur njoftimi i dëshmitarit të fundit Arsen Gjuti.
