Mediat lokale izraelite raportojnë se deri tani 40 persona kanë vdekur ndërsa më shumë se 700 të tjerë janë plagosur, si pasojë e sulmit të regjistruar mëngjesin e sotëm nga Gaza.
Ministri i mbrojtjes i Izraelit tha se Hamasi kishte “nisur një luftë” dhe trupat e tij “po luftonin kundër armikut në çdo vend”.
Ndërsa kryeministri izraelit Benjamin Netanyahu tha në një deklaratë: “Ne jemi në luftë dhe do të fitojmë”.
Netanyahu shtoi: “Armiku ynë do të paguajë një çmim të cilin nuk e ka njohur kurrë.”
Duke u kundërpërgjigjur ndaj sulmit, forcat ajrore izraelite konfirmuan se dhjetëra avionë luftarakë të Forcave të Mbrojtjes të Izraelit (IDF) goditën një numër kompleksesh ushtarake të Hamasit dhe qendra komanduese operacionale në Rripin e Gazës.
Presidenti i Palestinës Mahmoud Abbas tha se populli palestinez ka të drejtë të mbrohet kundër “terrorit të kolonëve dhe pushtimit të trupave”.
Rreth 740 izraelitë janë plagosur, raportoi kanali lokal i lajmeve N12. Shumica po trajtohen në spitalet lokale dhe të paktën 77 janë raportuar të jenë në gjendje kritike. Shkalla e lëndimeve, e kombinuar me numrin e viktimave deri më tani, e bën sulmin më vdekjeprurës në territorin izraelit në vite.
Numri i viktimave në Gaza është i pakonfirmuar, por 15 funerale janë raportuar deri tani, sipas Sky news.
