3 gjyqtare të Gjykatës së Apelit janë kanosur në sallën e gjyqit pas shpalljes së një vendimi. Treshja gjykuese, Valdete Hoxha, Lutfie Çelami dhe Edlira Petri, lanë në fuqi dënimet me nga 35 dhe 25 vite burg për të pandehur, të dënuar për plagosjen e Inez Hajrullës në Vlorë.
Pas vendimit në 16 Shtator, familjarët dhe të pandehurit kanë kanosur me jetë 3 magjistratët. Çështja është referuar në Prokurori e cila ka nisur edhe hetimet për kanosje të gjyqtarit.
Gjykata e Lartë dhe Këshilli i Lartë Gjyqësor reaguan duke dënuar sulmet ndaj përfaqësuesve te sistemit të drejtësisë.
Duke garantuar mbështetjen ndaj prokurorëve dhe gjyqtarëve, ata kërkuan ndalimin e sulmeve që cenojnë jetën, por edhe integritetin e magjistratëve.
Dëshmia e të penduarit të drejtësisë, Artan Tafani, i cili tregoi mbi dy plane të grupit të Laert Haxhisë për të eliminuar dy prokurore që hetuan çështjen ndaj tij u pasua me vendimin e menjëhershëm të marrjes në mbrojtje të dy prokuroreve Dolorez Musabelliut dhe Mertiat Selimit./Tv Klan
