Policia i ka ardhur në ndihmë 23 turistëve që kishin mbetur të bllokuar në “Kanionin e Lengericës”, Përmet.
Lajmin e ka bërë të ditur vetë Policia përmes një njoftimi, ku thuhet se turistët ishin gjermanë, polakë dhe francezë.
Gjithashtu mësohet se pas dhënies së ndihmës së nevojshme, turistët janë në gjendje të mirë shëndetësore.
“Punonjësit e Policisë iu vijnë në ndihmë 23 turistëve gjermanë, polakë e francezë, të cilët kishin mbetur të bllokuar në “Kanionin e Lengericës”, Përmet.
Shërbimet e Komisariatit të Policisë Përmet, mesditën e sotme kanë marrë njoftim se gjatë eksplorimit të natyrës në këmbë, 23 turistë kanë mbetur të bllokuar, në zonën e quajtur “Kanioni i Langaricës”, në Përmet.
Menjëherë janë nisur në drejtim të kësaj adrese, bashkë me shërbimet e zjarrfikësve.
Pavarësisht reshjeve të shumta të shiut, pas disa orësh kërkime shërbimet e Policisë kanë gjetur 23 turistët gjermanë, polakë, e francezë në vendin ku kishin mbetur të bllokuar për shkak të rritjes së nivelit të ujit në lumin e Langaricës, nga reshjet e shiut.
23 turistët janë shoqëruar për në Përmet dhe iu është ofruar ndihma e nevojshme mjekësore, e aktualisht ndodhen në gjendje të mirë shëndetësore”, njofton policia./Opinion.al
