Kryeministri Edi Rama ka përshëndetur operacionin antidrogë të zhvilluar në Tiranë dhe në disa qytete të vendit.
Përmes një postimi në rrjetet sociale, Rama ka shpërndarë një foto me bilancin e këtij megaoperacioni.
Ai njofton se pas këtij hetimi të imtësishëm janë shkatërruar 23 rrjete kriminale dhe është neutralizuar një burim i rrezikshëm dëmi për shëndetin e të rinjve.
Ndër të tjera Rama ka përshëndetur Policinë e Shtetit e cila sipas tij dita-ditës po rrit forcën goditëse ndaj keqbërësve të çdo lloji.
“Superoperacioni i Policisë së Shtetit u ka hedhur prangat gjatë gjithë natës së mbrëmshme dhe deri në orët e para të mëngjesit 233 shpërndarësve të drogës, të cilët kishin në shënjestër të veprimtarisë së tyre kriminale nxënësit e shkollave. Pas një hetimi të imtësishëm e mbledhjeje të provave në të gjitha qarqet e vendit janë shkatërruar 23 rrjete kriminale dhe është neutralizuar një burim i rrezikshëm dëmi për shëndetin e më të rinjve, ndërkohë që kjo është një tjetër provë e ngritjes së luftës kundër krimit të organizuar në një nivel të ri.
Një duartrokitje e fortë për Policinë e Shtetit, e cila dita-ditës po rrit forcën goditëse ndaj keqbërësve të çdo lloji dhe po afirmon fuqinë e saj si garante e rendit, sigurisë e qetësisë publike në çdo komunitet”, tha Rama.
