Teksa dita e sotme shënon 25 vite nga vrasja e Azem Hajdarit, liderit të Lëvizjes Studentore të vitit 1990-1991, në nder të kujtimit të tij në “Varrezat e Dëshmorëve” u zhvilluan homazhe, ku të pranishëm ishin familjarë, miq e anëtarë të “Grupimit Dhjetor ‘90”, ndër ta dhe ish-kryeministri Sali Berisha.
Në një prononcim për gazetarët, Berisha tha se Hajdari edhe sot pas 25 vitesh, është i gjallë dhe i pavdekshëm në zemrat e atyre që jetuan diktaturën dhe panë te ai, shpëtimtarin e tyre.
“Azem Hajdari edhe sot pas 25 vitesh Ai u shndërrua në një magnet të fuqishëm të rinisë studentore, një lider epik me guximin e tij, i cili në një kohë të shkurtër gjunjëzoi diktaturën. Ekzekutimi i tij, para selisë së PD, është vrasja shtetërore më e rëndë në historinë e shqiptarëve. Është atentati më makabër! Azem Hajdari, edhe sot pas 25 vitesh, është i gjallë dhe i pavdekshëm në zemrat e atyre që jetuan diktaturën dhe panë te ai, shpëtimtarin e tyre. Është i pavdekshëm dhe i përjetshëm në altarin e lirisë të kombit shqiptar. Kurse ata, që në një akt hakmarrje primitive, organizuan pritën dhe e ekzekutuan atë, do të mbeten të damkosur përjetë për krimin më të shëmtuar politik të kohërave. Azem Hajdari është një kushtrim i gjallë për të gjithë shqiptarët, që sot të ngrihemi, të përmbysim diktaturën e drogës, diktaturën e krimit, diktaturën e vjedhjeve të pasardhësit direkt të njërit prej xhelatëve më të pamëshirë të kombit në histori, Edi Ramës”, tha Berisha.
