Dy fëmijë ishin mes 18 emigrantëve të djegur nga zjarri në një pyll në verilindje të Greqisë.
Mediat greke shkruajnë se lajmin e ka konfirmuar eksperti që kreu inspektimin fillestar në jug të fshatit Avantas, vend ku u gjetën mbetjet trupore të viktimave të djegura.
Pavlos Pavlidis, mjek në qytetin e Alexandroupoli dhe njëherazi një ndër ekspertët ka zbuluar detaje nga tragjedia.
“Ishin gjithsej 18 trupa të djegur, të gjithë meshkuj dhe dy prej tyre ishin fëmijë. Ata u gjetën të gjithë në grupe prej dy ose tre personash në një distancë prej 500 metrash, me sa duket duke u përpjekur të arratiseshin, dhe disa prej tyre u dogjën në një barakë”- tha ai.
18 trupat u gjetën në një zonë rurale në Evros,më pas numri shkoi në 26, ku zjarret po digjen jashtë kontrollit për të katërtën ditë radhazi. Të vdekurit ishin emigrantë, sipas ministrit të Migracionit Dimitris Keridis.
Pavlidis shtoi se trupat do të dërgohen në spital të mërkurën për ekzaminim nga mjekët ligjor./Opinion.al
