Avioni më të cilin kanë udhëtuar pasagjerët në fluturimin nga Cagliari në Romë, ka fluturuar i arnuar me ngjitës në pjesën e tij të jashtme.
Këtë ngjarje e ka bërë publike ish-deputeti i Sardenjës, Mauro Pili, i cili ka postuar në profilin e tij në Facebook pamjet e riparimit të avionit, i cili ishte i arnuar me ngjitës në disa pjesë të tij duke shkaktuar reagime të ndryshme tek ndjekësit e tij.
“Na trajtojnë si një koloni të botës së tretë. Nuk më kishte ndodhur ende një aeroplan i ngjitur me shirit!”,shkruan Mauro Pili.
Pamjet që tregojnë një arnë të madhe në një pjesë të avionit, e cila është mbuluar me një ngjitëse po bëjnë xhiron e mediave italiane. Mediat thonë se askush nga pasagjerët nuk vuri re asgjë para nisjes. Pas publikimit të pamjeve reagoi edhe kompania e fluturimit, duke thënë se linja e tyre operon gjithmonë në përputhje me standardet e sigurisë të diktuara nga autoritetet kompetente dhe me respekt të plotë për pasagjerët dhe stafin e saj në bord.
“Ndërhyrja e mirëmbajtjes ishte e nevojshme për të trajtuar përkohësisht një dëmtim të gjetur në një panel. Ky veprim është kryer në përputhje me manualet e miratuara nga prodhuesi, i cili në këto raste parashikon përdorimin e ‘ngjitësit shirit’ metalik për përdorim aeronautik”, thuhet në reagimin e kompanisë.
Është një Airbus i Ita Airëays, një nga të shumtët që lidh çdo ditë Cagliarin dhe Romën, i cili u nis mëngjesin e sotëm nga aeroporti Mario Mameli në Elmas me destinacion Romën Fiumicino. Dhe menjëherë pas uljes, pasagjerët e avionit kanë vërejtur “riparimin me ngjitës” te avionit./Opinion.al
