Një poster i madh që denoncon abuzimin seksual të fëmijëve nga klerikët është vendosur gjatë natës në Lisbonë vetëm disa orë para mbërritjes së Papa Françeskut.
Françesku, duke filluar një udhëtim pesë-ditor në Portugali, zbarkoi në bazën ajrore ushtarake të Lisbonës për një mbledhje globale të të rinjve katolikë të njohur si Dita Botërore e Rinisë, e mbajtur çdo dy ose tre vjet në një qytet tjetër.
Udhëtimi i Françeskut po zhvillohet nën hijen e skandalit të abuzimit seksual të klerit në Portugali dhe kritikave për kostot e larta të ngjarjes. Ngjarja vjen më pak se gjashtë muaj pas publikimit të një raporti nga një komision portugez, i cili zbuloi se të paktën 4,815 të mitur ishin abuzuar seksualisht nga klerikët kryesisht priftërinj -gjatë shtatë dekadave.
Komiteti theksoi se kjo është vetëm “maja e ajsbergut”. Papa Françesku , i cili do të jetë në Portugali deri më 6 gusht, pritet të takohet privatisht me viktimat e abuzimit . Posteri u postua në Avenida Almirante Reis një nga rrugët më të gjata dhe më të ngarkuara të Lisbonës dhe në të shkruhet “4,800+ fëmijë të abuzuar nga Kisha Katolike në Portugali”.
Patriarku i Lisbonës Manuel Clemente tha të hënën se angazhimi i kishës portugeze për të trajtuar abuzimin seksual nga klerikët ishte “i plotë”. Dy postera të tjerë janë vendosur gjithashtu në komunat fqinje Loures dhe Oeiras, ku do të zhvillohen edhe aktivitetet e Ditës Botërore të Rinisë
Françesku ka miratuar ndryshime të shumta në Kishë që nga zgjedhja e tij në 2013, duke mërzitur ndonjëherë konservatorët pasi u ka dhënë grave më shumë role dhe e ka bërë atë më mikpritëse dhe më pak gjykuese ndaj disa grupeve, duke përfshirë anëtarët e komunitetit LGBT./Opinion.al
