Kryeministri Edi Rama ka reaguar sërish në lidhje me situatën e zjarreve në vend. Në një status në rrjetet sociale, kreu i qeverisë shkruan se një tjetër zjarrëvënës është arrestuar në flagrancë dhe sipas tij kjo është një tjetër arsye për të përsëritur apelin ndaj prokurorëve e gjykatësve në rrethe, që të zbatojnë ligjin, i cili parashikon deri në 15 vjet burg për zjarrvënësit.
“Një tjetër zjarrvënës i arrestuar në flagrancë nga Policia e Shtetit dhe një tjetër arsye për ta përsëritur apelin ndaj prokurorëve e gjykatësve në rrethe, që të zbatojnë me përgjegjshmëri ligjin, i cili parashikon deri në 15 vjet burg për këtë soj kriminelësh.
Edhe njëherë përgëzime Policisë së Shtetit për punën shumë të mirë që po bën në këtë front të mbrojtjes së një pasurie kolosale, të krijuar nga breza të tërë për brezat e ardhshëm’-shkruan Rama.
