Largimet jashtë vendit, por edhe zhvillimi që kanë marrë fusha të caktuara të ekonomisë brenda vendit kanë zgjeruar akoma më shumë boshllëqet e fuqisë punëtore.
Ekspertët e punësimit thonë se sektor si teknologjia e mjedisit, turizmi, por edhe fushat e mësuesisë kanë mungesa të theksuara për punonjës.
“Tregu ka nevojë të jashtëzakonshme për punonjës të të gjitha degëve. Ka degë të mësuesisë, të zooteknikës, bujqësisë dhe turizmit të cilat kanë nevoja”, shprehet ekspertja e punësimit, Gertjana Hasalla.
Futja e këtyre degëve në 39 progamet prioritare,ku çdo maturant fitues pavarësisht mesatares mund të përfitojë një bursë sa paga minimale prej 40 mijë Lekësh, shihet nga ekspertët e punësimit si një shtysë për plotësimin e kërkesave në treg.
“Do ketë patjetër një rritje. Do shikojmë që pas tre vitesh do kemi më shumë të diplomuar në këto fusha që mungojnë përgjithësisht në Shqipëri”, vijon Hasalla.
Kërkesa e lartë për punonjës po rrit edhe gjasat për paga më të larta.
“Një kërkesë e lartë do na sjellë patjetër që të kemi edhe më shumë vende pune me paga të larta, po përveç pagave ne kemi nevojë për kushte të mira pune”, pëmbyll ekspertja.
Viteve të fundit maturatët po zgjedhin më së shumti shkencat teknologjike, mjekësinë dhe infermierinë, profesione për të cilat tregu I punes ka kërkesa të mëdha si brenda ashtu edhe jashtë vendit.
Për të gjithë maturantët më 29 Korrik hapen aplikimet për përzgjedhjen e 10 degëve të studimit./ Tv Klan
