Sekretari i Përgjithshëm i PS-së, Blendi Klosi deklaroi sot se në muajin shtator do të mbahet Kongresi i jashtëzakonshëm i socialistëve.
Teksa është pyetur sot në lidhje me vendimin që do të marrë PS për Arben Ahmetajn, i shpallur në kërkim nga policia, Klosi tha se vendimi për çështjen e Ahmetajt do të merret në shtator.
Ndër të tjera ai theksoi se Partia Socialiste bën ndryshime për t’u përmisuar.
“Sot në ditën time të parë si sekretar i Përgjithshëm të PS-së vijoj që tu jem mirënjohës mbi 100 mijë anëtarëve të PS-së. Kemi nderin krenarinë dhe fatin që i kemi këto detyra. Është një pyetje që i takon grupit parlamentar i cili padyshim që në mbledhjen e tij të parë në fillim të sezonit parlamentar do të marrë edhe vendime të plota për çështje të cilat shqetësojnë dhe një ndër këto është edhe e Ahmetajt. Kam bindjen e thellë se në sërish do të fitojmë. Ne bëjmë ndryshime për të përmirësuar veten tonë”, tha Klosi.
