Gjatë zhvillimit të seancës së posaçme të ditës së sotme, deputeti i Partisë Socialiste, Arben Pëllumbi prezantoi raportin e PS për çështjen e Arben Ahmetajn.
Në nisje të fjalës së tij, ai replikoi ndaj deputetit të PD, Gazment Bardhi duke thënë se ai mbajti qëndrim politik dhe se përmendi shumë emra gjatë fjalës së tij në kuvend, mes të cilëve dhe atë të kryeministrit, i cili nuk shfaqet askund në raportin e SPAK.
Pëllumbi theksoi se është gjykata ajo që thotë fjalën e fundit për fajësinë e ish-zv.kryeministrit dhe jo politika.
“Që në momentin e parë kur u mblodh Këshilli i Mandateve, qëndrimi i opozitës ka qenë politik, kundër procedurës. Edhe sot që duhet të ndiqnim procedurë, Bardhi mbajti një qëndrim politik, larg raportit që lexoi. Ne nuk jemi gjykatë dhe prokurorë, nuk mund të japim mendime personale. Kemi një raport të SPAK që duhet të ndeshet në Gjykatë me kolegun tonë dhe është ajo që jep vendimin.
Deri në atë kohë të gjithë duhet të njohim prezumimin e pafajësisë. Bardhi përmendi shumë emra, shumë kolegë dhe përmendi kryeministrin, emri i të cilit nuk rezulton askund në raportin e SPAK. Tolerancën tonë e konsideruat dobësi, ky është një gabim i rëndë”, tha Pëllumbi./Opinion.al
