Të paktën 25 persona u vranë dhe 8 të tjerë u plagosën në një aksident të rëndë në Indinë perëndimore ku një autobus u përplas dhe mori flakë në mes të autostradës.
Autobusi po udhëtonte për në qytetin Pune kur u përplas me një shtyllë dhe u përmbys, duke shkaktuar djegien e rezervuarit të tij, tha për AFP oficeri i lartë i policisë.
“Në autobus ishin rreth 30 deri në 35 persona. Njëzet e pesë persona kanë vdekur dhe tetë të tjerë janë plagosur”, tha ai.
Të plagosurit janë shtruar në një spital pranë vendit të përplasjes në shtetin Maharashtra. Drejtuesi i autobusit është futur në paraburgim për t’u marrë në pyetje, tha për gazetarët ministri Girish Mahajan.
Mahajan shtoi se trupat ishin djegur përtej njohjes dhe ekipet e mjekësisë ligjore janë duke ndihmuar në identifikimin e tyre. Një nga të mbijetuarit e aksidentit tha se doli nga automjeti i djegur përmes një dritareje.
Policia tha se kishte nisur një hetim për aksidentin dhe njoftoi se tre fëmijë ishin në mesin e të vdekurve.
Shefi i ministrit të Maharashtrës, Eknath Shinde tha se ndjeu “dhimbje të thellë” për aksidentin dhe u zotua për kompensim prej 500,000 rupi (6,100 dollarë) për familjet e të vrarëve.
Aksidentet janë të zakonshme në rrjetin e gjerë të rrugëve të Indisë, të cilat janë të pashtruara dhe tejet të rrezikshme.
Në maj, humbën jetën 21 njerëz kur një autobus ra nga një urë në Indi, siç thuhet pasi shoferin e zuri gjumi në timon./Opinion.al
