Ahmetaj rekurs në Gjykatën e Lartë, kërkon heqjen e sekuestros për vilën në Palasë

Avokatët e ish zv/kryeministrit Arben Ahmetaj, Ardian Vishaj, Henrik Ligori dhe të ish-bashkëshortes së tij, kanë bërë rekurs në Gjykatën e Lartë për sekuestron e vendosur nga gjykata për vilën në Palasë.
Sipas Euroneës Albania, bashkë me avokatët e Ahmetajt kërkesës i është bashkangjitur edhe avokati i shtetases zvicerane në emër të së cilës ndodhet prona në Palasë.
Bëhet fjalë për urdhrin numër 62 të Gjykatës së Posaçme të Apelit dhe vendimin numër 137 të Gjykatës së Posaçme të Shkallës së parë.
Avokatët e quajnë te padrejtë që të sekuestrohet një pronë që nuk është në pronësi të Ahmetajt dhe as e ish-bashkëshortes së tij. Ata pretendojnë që vilën e kanë pasur thjeshtë në përdorim.
Më herët Gjykata e Lartë ka rrëzuar rekursin e heqjes së sekuestros së vilës në Hamallaj që është në emër të bashkëjetueses së Ahmetajt, Erjola Hoxhaj.
Kujtojmë se të enjten e kaluar Ahmetaj u paraqit në SPAK, ku u mor në pyetje për rreth 6 orë.
Në përfundim të marrjes në pyetje ai nuk pranoi të flasë për gazetarët, por tha se “sqaroi pozicionin” e tij.\
Arben Ahmetaj është në hetim nga Prokuroria e Posaçme për 4 vepra penale: “shpërdorim detyre”, “korrupsion”, “pastrim parash” dhe “fshehje e pasurisë”.