Kryetari i Aleancës për Ardhmërinë e Kosovës, Ramush Haradinaj, gjatë një seance në kuvend solli në vëmendje mocionin e kërkuar për shkarkimin e qeverisë Kurti, ndërsa lëshoi kritika për opozitën.
“Pse ka hezitime për mocion ku është problemi le të më tregojnë ata që po hezitojnë për mocion ku e keni problemin të gjithë ju që hezitoni për mocion a është e vërtetë që e kemi humbur besimin e institucionet euroatlantike a është e vërtetë që kanë filluar ndëshkime dhe a është e vërtetë që jemi kah dobësohemi? Pse bre nuk po keni guxim me dal me thanë po e votoj mocionin çka është duke ndodhur tek opozita, iu lutem ku e keni problemin kolegë opozitarë PDK e LDK që po mendoni ende se kush përfiton nga mocioni veç një përfitues është Kosova dhe interesi ynë”, tha Haradinaj.
Deputetja e PDK-së, Blerta Deliu-Kodra, i konsideroi të gabuara veprimet e kryeministrit Albin Kurti në veri.
“Sot si rezultat i qasje aventureske të Albin Kurtit kemi më pak sovranitet në pjesën veriore. Kemi më pak siguri, më pak rend dhe ligj, pra kemi edhe me pak shtet. Çfarë kemi sot janë sulmet e vazhdueshme të papranueshme të partisë në pushtet për NATO-n si organizatë paqeruajtëse që garanton integritetin territorial të Kosovës, për Shtetet e Bashkuara të Amerikës si garanci e shtetësisë sonë. Nxitja e një gjuhe të tillë shpërfillëse dhe mosmirënjohëse nga eksponentë të pushtetit është prej qëllimeve të qarta të Serbisë në luftën e saj hibride ndaj shtetit tonë”, tha Deliu-Kodra.
