Dy persona janë arrestuar nga policia e Gjirokastrës, pasi u kapën në tentativë për të transportuar 15 emigrantë të paligjshëm në këmbim të pagesës.
Uniformat blu bëjnë me dije se kanë rënë në pranga shtetasit R.R. 49 vjeç dhe F.M. 39 vjeç, të dy banues në Durrës.
Pas kontrolleve policore janë sekuestruar 2 automjetet me të cilat transportoheshin emigrantët dhe 2 celularë.
“Seksioni për Hetimin e Trafiqeve të Paligjshme, në vijim të punës së pandërprerë, në terren, për parandalimin, evidentimin dhe goditjen e aktivitetit kriminal të dhënies ndihmë shtetasve të huaj, për kalim të paligjshëm të kufirit, mbështetur dhe në inteligjencën informative, ka finalizuar operacionin policor të koduar “Road Guard 63”, si rezultat i të cilit u bë arrestimi në flagrancë i shtetasve R. R., 49 vjeç dhe F. M., 39 vjeç, banues në Durrës.
Në aksin nacional Gjirokastër-Tepelenë, shtetasit R. R. dhe F. M. janë kapur në flagrancë duke transportuar kundrejt pagesës, me 2 automjete, në drejtim të Tiranës, 15 emigrantë nga vendet MENA që kishin synim kalimin e paligjshëm në vendet fqinje.
Në cilësinë e provës materiale u sekuestruan 2 automjetet dhe 2 celularë”, tha policia.
Materialet i kaluan Prokurorisë pranë Gjykatës së Shkallës së Parë të Juridiksionit të Përgjithshëm Gjirokastër, për veprime të mëtejshme./Opinion.al
