Deputetja e Partisë Popullore në Serbi, Sanda Rashkoviç Iviç, tha sot se presidenti serb Aleksandër Vuçiç synon të mobilizojë fëmijët serbë për luftë në Kosovë, lëvizje kjo që e ka krahasuar me atë që bëri Adolf Hitleri në vitin 1945.
Duke komentuar deklaratën e Vuçiçit se fëmijët serbë të moshës 12 dhe 13 vjeçare në Kosovë janë gati të vdesin “sepse janë ngopur me kryeministrin e Kosovës Albin Kurti”, Rashkoviç Iviç tha se kjo deklaratë ishte e çmendur dhe e papërgjegjshme.
“Ka shumë kohë që nuk kam dëgjuar diçka kaq të çmendur, të pashpirt dhe të papërgjegjshme. Të thuash se fëmijët 12 dhe 13 vjeç duan të vdesin është tipike vetëm për vendet islamike ku mbretëron xhihadi. Kështu ishte edhe në vitin 1945 në Gjermaninë naziste, kur Hitleri nuk kishte më askënd që të mobilizonte për luftë”, tha Rashkoviç Iviç.
E pyetur nga Beta nëse presidenti Vuçiç duhet t’i nënshtrohet mbikëqyrjes psikiatrike për shkak të një deklarate të tillë, Rashkoviç Iviç tha se ajo si psikiatre nuk mund t’i përgjigjet kësaj pyetjeje pa një ekzaminim paraprak.
“Vlerësimet për gjendjen mendore të asnjë personi nuk mund të bëhen pa një ekzaminim paraprak tet a tet. Sigurisht që është një deklaratë e çmendur dhe e papërgjegjshme dhe ata që bëjnë deklarata të çmendura dihet se do të trajtohen më tej”, shpjegoi psikiatrjA.
Ajo shtoi se futja e fëmijëve të mitur në konfliktet në Kosovë tregon se Vuçiq nuk ka ndonjë zgjidhje të arsyeshme për çështjen e Kosovës.
“Vuçiq e pranoi planin franko-gjerman dhe tani po thotë se fëmijët serbë janë të gatshëm të vdesin kundër atyre me të cilët ai u pajtua me atë plan”, tha Rashkoviç Iviç.
Presidenti serb AleksandëR Vuçiç tha sot se situata në Kosovë është “tmerrësisht e rëndë dhe se fëmijët e moshës 12 dhe 13 janë gati të vdesin sepse të gjithë janë të ngopur me kryeministrin e Kosovës Albin Kurti”.
“Nuk e duroj dot më fizikisht. Nuk mund të fle asnjë natë. Sepse ndryshe nga ju, unë e di se çfarë ndodh çdo natë në veri të Kosovës. Fjalë për fjalë gjithçka vlon. Fëmijët e moshës 12, 13 vjeç janë gati të vdesin, gjë që duhet ta parandalojmë. Ata janë ngopur me Kurtin”, tha Vuçiç në një konferencë për media pas takimit me presidenten e Sllovenisë Natasha Pirc Musar./Opinion.al
