Pas dorëheqjes së Jorida Tabakut nga posti i nënkryetares së Partisë Demokratike, janë larguar edhe dy anëtarë të Kryesisë të kësaj force politike.
Mësohet se kanë dhënë dorëheqjen nga pozicioni i tyre, dy anëtarë të kryesisë së PD, konkretisht Ori Nebiaj dhe Flamur Hoxha.
Kujtojmë që në mbledhjen e djeshme të Kryesisë, Hoxha ka votuar kundër, në lidhje me zgjedhjet e reja për kryetar në parti, ndërsa, Nebijaj abstenoi.
Mbledhja e djeshme është shoqëruar me tensione, ku mbështetës militantë të ish-kryedemokratit, Lulzim Basha kanë sulmuar disa anëtarë dhe deputetë teksa po largoheshin nga selia.
Për këto incidente ka pasur një reagim edhe nga kreu i grupit parlamentar të PD, Gazment Bardhi i cili ka dënuar me forcë aktet e dhunës kundër deputetëve të PD, anëtarëve të Kryesisë dhe gazetarëve. Sipas tij kjo sjellje hedh në erë bashkëjetesën brenda kësaj force politike dhe dërrmon në mënyrë përfundimtare besimin e qytetarëve tek PD./Opinion.al
