Në një deklaratë këtë të diel, ushtria ruse pretendon se ka kryer një valë sulmesh ajrore ndaj aeroporteve ushtarake në Ukrainë gjatë natës. “Forcat e Armatosura të Rusisë kryen një valë sulmesh nga ajri gjatë natës”.
Edhe Kievi reagoi duke konfirmuar se ushtria e Putinit ka bombarduar një bazë ajrore në pjesën qendrore të vendit. Megjithatë, pavarësisht këtyre pretendimeve, një vajzë vetëm 2 vjeç ndërroi jetë, ndërsa shumë civilë të tjerë mbetën të plagosur nga sulmet e natës së kaluar në Ukrainë.
Trupi i të miturës u nxor nga rrënojat në orët e para të mëngjesit në lagjen e Pidhorodnenska në Dnipro, teksa sipas guvernatorit të zonës, nga bombat mbetën dhe 22 persona të tjerë të plagosur.
Shpërthime janë dëgjuar edhe mbi Kiev, ku sistemet e mbrojtjes ajrore janë vendosur sërish në gatishmëri, për eliminimin e raketave armike. Zyrtarët në Sumy regjistruan 87 shpërthime si rezultat i granatimeve ruse, duke folur për lëndime dhe shkatërrim të infrastrukturës.
