Ukrainasi Fedir Alpatov, i cili u arrestua së bashku me dy rusët pasi sulmuan dy ushtarët shqiptarë në ish- Uzinën e Armëve në Gramsh ka folur sot në një dalje për mediat.
Në prononcim për media, ukrainasi Alpatov u shpreh se ai nuk largohet dot nga vendi ynë pasi nuk ka pasaportë.
Ai thekson se nuk është kriminel dhe se kishte ardhur në Shqipëri për të mësuar për historinë dhe u akuzua për spiunazh.
Alpatov tregon se si u arrestua nga policia, duke folur me detaje për ngjarjen e ndodhur ditën e sulmit në Gramsh.
“Dua të marr makinën time, nuk mund të largohem jashtë vendit për shkak të pasaportës pasi ma kanë bllokuar. Për mua dhe për familjen time ishte një tragjedi e madhe. Përpara se të vija në Shqipëri unë kisha një punë shumë të mirë, kisha karrierë, kisha një të dashur. Kisha ardhur në Shqipëri për të mësuar për historinë, të mësoja për komunizmin, për Enver Hoxhën dhe për gjëra të tjera interesante të historisë së Shqipërisë. U arrestova gjatë udhëtimit tim dhe ata më akuzuan mua për spiunazh. 5-6 ditë më vonë Edi Rama tha se ne nuk jemi spiunë dhe objekti ishte i deklasifikuar. Por ata që më lanë mua në burg për 9 muaj. Unë humba gjithça.
Ishte një fabrikë e braktisur në Gramsh dhe ne vendosëm të shihnim çfarë kishte brenda. Nuk kishte dritare dhe ne vendosëm të futeshim brenda. Brenda godinës ne u përballëm me disa djemë, tentuam të iknim në drejtime të ndryshme. Mikhail shkoi në një drejtim, unë në një drejtim tjetër. Siç e di unë, Misha vrapoi dhe pas disa momentesh ishte një makinë e zezë nga ku dolën disa djem që ndaluan Mishën. Nuk dukeshin si ushtarakë, makina ishte një “Audi” e errët. Misha mendoi se ata po e sulmonin dhe vendosi të mbrohej me sprai me piper. Ata e morën, e goditën dhe e futën në stacionin e policisë”, ka thënë Alpatov.
Gjykata e Elbasanit liroi dje nga paraburgimi dy rusët Svetlana Timofevaa dhe Mikhail Zorin si dhe ukrainasin Fedir Alpatov, të akuzuar për incidentin në uzinën e armëve në Gramsh vitin e kaluar./Opinion.al
