Deputeti i partisë Demokratike, Edmond Spaho ka bërë me dije se ka bërë kallëzim penal për incidentin e ndodhur në qendrën e votimit në Zvezdë të Maliqit.
Spaho pretendon se është dhunuar nga të rinj me kapuça që mbështesin kryebashkiakun e bashkisë së Maliqit, Gëzim Topciun.
Sipas Spahos, ngjarja ka nisur që në momentin kur ky i fundit ka shkuar në qendrën i votimit për të kontrolluar ecurinë e procesit të votimit.
Ofendimet dhe goditjet sipas tij, kanë vazhduar deri në pjesën e jashtme të godinës, ku më pas është detyruar të njoftojë policinë dhe komisionin zonal të zgjedhjeve.
“Unë shkova në qendrën e votimit në Zvezdë për të kontrolluar ecurinë e procesit të votimit. Që në hyrje të shkollës, në verandë konstatova një grup të madh të rinjsh të veshur me kapuça. Hyra në korridorin e shkollës pa hyrë në qendrën e votimit dhe u përpoqa t’i bëj shenjë njërit prej përfaqësruesve të subjektit që përfaqësoj që të dalë jashtë dhe të më informojë, sic veproj zakonisht. Ndërkohë 2 gorilla të gjatë më dolën para me kurriz dhe nuk më lejonin të hyja.
U zhvendosa djathtas për të krijuar hapësirë, por edhe ata u zhvendosën djathtas. U përpoqa të shmang njërin prej tyre por mu kthyen dhe më thanë, ti deputet nuk ke për të hyrë këtu. I shpjegova që do thërras përfaqësuesin tim për tu informuar por nuk më lejoi dhe në këto kushte u përpoqa ta tërheq dhe të hap rrugën për të kryer detyrën time. Është e ligjshme që të hyj. Unë hyra në korridor dhe gjithë ai grup njerëzish duhet të qëndrojë 200 metra larg qendrës së votimit sepse po intimidonin zgjedhësit që po vinin për të votuar.
U detyrova të dal jashtë, të gjithë ata dolën dhe në verandën e shkollës jam përballur me një lumë të sharash, të bërtiturash e akuzash. U detyrova të thërras policinë dhe komisionin zonal të zgjedhjeve. Kur po prisja policinë, deputeti Ilir Pendavinji filloi me një lum të sharash, të bërtiturash, hidheshin parulla politike. Madje shprehte dëshirën që zgjedhjet do t’i fitojmë ne.
Kur Pendavinji me grupin e tij po shanin e intimidonin, dikush nga njerëzit e tij më ka goditur në buzën e sipërme në krahun e majtë. Për të mos u acaruar situata, kam dalë jashtë territorit të shkollës e kam pritur ardhjen e KZAZ dhe të policisë. Erdha në polici për të bërë kallëizm penal ku i dhashë edhe videot të njerëzve që më penguan si dhe grupin e të rinjve me kapuça që intimidonin votuesit. Këto ndodhin se Gëzim Topçiu do të fitojë me çdo kusht, me banda”, tha Spaho./Opinion.al
