Një 22-vjeçar shqiptar u arrestua nga policia britanike për prodhim lëndësh narkotike.
Sipas mediave të huaja, i riu u punësua nga dy burra për të “ujitur bimët”, që sipas tij nuk ishte në dijeni se kishte të bënte me kanabis. Ismail Tota pranoi të shkonte me ta në një adresë për t’u punësuar.
Ai është arrestuar pas bastisjes së ambjentit ku kultivoheshin bimët narkotike, në të cilin janë sekuestruar rreth 63 bimë me vlerë deri në 26,500 £.
Tota pretendon se është kërcënuar edhe me familjen nëse përpiqej të arratisej.
Sipas avokates së Totës, ai ishte i pastrehë dhe ka ardhur në Britani vetëm katër javë më parë pasi kishte takuar dy shqiptarë në një kafe Costa.
“Ai i tha policisë se ishte kërcënuar dhe duhej të shkonte me ta në një shtëpi. U udhëzua të qëndronte atje dhe po e vëzhgonin në kamera. Nëse do të tentonte të arratisej ata do të dëmtonin familjen e tij në Shqipëri. Ai kishte frikë të largohej”, tha avokatja.
Më tutje ajo ka thënë se Tota ishte kryefamiljari në shtëpinë e tij, por e kishte të vështirë të gjente punë në Shqipëri. Ai erdhi në Mbretërinë e Bashkuar ilegalisht, dhe nuk ishte në gjendje të gjente punësohej legalisht sepse nuk kishte dokumentet e duhura.
Më 4 Prill ai u dënua me 7 muaj burg. Deri më tani ai ka vuajtur gjysmën e dënimit dhe pritet që pasi ta përfundojë plotësisht, të deportohet në Shqipëri. /Opinion.al
