Luftëtarët e ISIS dyshohet se kanë vrarë të paktën 26 njerëz ditën e dielë në Siri, pasi ishin duke kërkuar tartuf me vlerë në shkretëtirën siriane.
Observatori Sirian për të Drejtat e Njeriut me qendër në Britani tha se “civilë dhe të paktën 10 luftëtarë” ishin në mesin e “26 personave të vrarë në një sulm nga luftëtarët e ISIS ndërsa po mblidhnin tartuf në shkretëtirën në lindje të Hama.”
Midis shkurtit dhe prillit të çdo viti, qindra sirianë të varfër kërkojnë për tartuf në shkretëtirën e madhe siriane, një strehë e njohur për ekstremistët që është gjithashtu e mbushur me mina tokësore.
Sipas Observatorit, që nga shkurti, më shumë se 200 njerëz, shumica prej tyre civilë, janë vrarë në sulmet e ISIS ose nga minat tokësore të lëna nga ekstremistët.
Viktimat përfshinin 15 njerëz që kërkonin tartuf, të cilëve ISIS i kishte ekzekutuar muajin e kaluar duke iu prerë fytin.
Në shkurt, luftëtarët e ISIS hapën zjarr ndaj gjuetarëve të tartufit dhe vranë të paktën 68 njerëz, tha monitoruesi i luftës në atë kohë.
Shkretëtira siriane është e njohur për prodhimin e disa prej tartufit më cilësor në botë, i cili mund të shitet deri në 25 dollarë për kilogram (2.2 paund) në varësi të madhësisë, në një vend ku paga mesatare mujore është rreth 18 dollarë.
Lufta e Sirisë ka marrë jetën e rreth gjysmë milioni njerëzve dhe ka zhvendosur miliona që kur shpërtheu në mars 2011 me shtypjen brutal të protestave antiqeveritare.
Mbetjet e eksplozivëve të vendosur nga të gjitha palët në konflikt tani po marrin më shumë jetë në Siri se kudo tjetër në botë, thonë Kombet e Bashkuara.
Që nga viti 2015, minat tokësore dhe mbetjet e tjera eksplozive kanë vrarë ose plagosur mesatarisht pesë persona çdo ditë, sipas të dhënave të OKB-së./Opinion.al
