Në një bashkëbisedim me qytetarët në “Facebook”, ish-kryeministri Sali Berisha ka folur edhe për kandidatët e tjerë nga opozita si Roland Bejko nga PD dhe Lajla Përnaska nga PDIU, që garojnë për Bashkinë Tiranë.
Berisha tha se çdo kandidat tjetër përveç Këlliçit që është kandidat i opozitës së bashkuar, është kandidat i Edi Ramës dhe kandidon vetëm për të ndihmuar, Erion Veliajn.
“Çdo kandidat tjetër përveç Këlliçit që është kandidat i opozitës së bashkuar, është kandidat i Edi Ramës dhe kandidon vetëm për të ndihmuar në mënyrën më tragjike kandidatin e Edi Ramës i cili përbën në vetvete falsitetin politik më të madh që ka njohur kryeqyteti ndonjëherë.
Përbën në vetvete një nga njerëzit më të korruptuar të këtij vendi. Përbën në vetvete një nga njerëzit më mashtrues. Besoj se e keni të qartë që të gjithë kandidatët e Bashës dhe të bravës nuk janë gjë tjetër vetëm paterica të Erion Veliajt dhe janë njerëz që kanë bërë zgjedhjen e tyre. Kanë kaluar në krah, në sqetullat e Edi Ramës, s’kanë asgjë të përbashkët me të djathtën. Nuk besoj kurrë që e djathta mund të bëhet me njerëz si Alibasha dhe Lulzim Brava, të cilët janë pengje në lidhje krimi të Edi Ramës”, deklaroi Berisha.
