Një gangster shqiptar i dënuar për vrasje në vendin e tij i është dhënë anonimiteti, pasi kërkoi azil në Mbretërinë e Bashkuar, për ta mbrojtur atë nga rivalët, shkruan DailyMail në një artikull.
Shtetasi i moshës së mesme mbërriti me varkë në Britani pasi kreu një dënim të përjetshëm për vrasje dhe vepra të tjera “shumë të rënda” në Shqipëri. Mirëpo, një gjykatës vendosi për mbajtjen të fshehtë të identitetit të tij për çështje sigurie – pasi ai pretendoi se ishte në rrezik nga mafiozët rivalë.
Deputeti konservator David Morris tha për The Sun: “Është një vendim i egër që tregon përbuzje për qytetarët britanikë”.
Ndërkohë, deputeti konservator Philip Davies tha se zbulimi i identitetit dhe historisë kriminale të këtij personi ishte “qartësisht në interesin publik”. Gjykatësi Nicholas Aldridge, tha se asgjë nuk mund të publikohej që mund të identifikonte ‘drejtpërdrejt ose tërthorazi’ kriminelin, duke përfshirë krimet e tij të mëparshme.
Ndërkohë për shtetasin shqiptar i cili ndodhet në një qendër imigracioni, në paraburgim së shpejti pritet një vendim për dëbimin e tij nga vendi.
Një zëdhënës i Zyrës së Brendshme tha: “Është një shembull tjetër tronditës se pse ne duhet të ndalojmë anijet.”
Kjo vjen pasi shifrat e reja zbuluan se vetëm 215 nga 45,755 emigrantë që kanë ardhur me një varkë të vogël vitin e kaluar janë dëbuar. Më shumë se 25,000 prej tyre u zbuluan se ishin refugjatë, pavarësisht pretendimeve të qeverisë se shumica e atyre që kalojnë me anije të vogla janë emigrantë ekonomikë.
Bazuar në të dhënat e Home Office, shifrat tregojnë gjithashtu se një në pesë emigrantë që vijnë përmes kanalit, janë fëmijë. Vitin e kaluar janë shënuar shifra rekord, që numëronin 1,104 varka me një mesatare prej 41 personash çdo ditë./Opinion.al
