Shoferi i autobusit së linjës së Laprakës është vënë në pranga nga policia pasi është kapur në gjendje të dehur.
Pas kontrollove të shumta të bëra nga uniformat blu është arrestuar në flagrancë 57-vjeçari me iniciale G.T., i cili pas testit të alkoolit ka rezultuar se drejtonte autobusin në gjendje të dehur.
“Shërbimet e Policisë Rrugore të Tiranës vijojnë kontrollet me shërbime të shtuara në terren dhe me mjete inteligjente, me qëllim parandalimin e aksidenteve rrugore. Kontrolle të përditshme, edhe ndaj drejtuesve të automjeteve të transportit publik, për shkak të rëndësisë që paraqet ky sektor.
Si rezultat, u arrestua në flagrancë shtetasi G. T., 57 vjeç, banues në Tiranë, sepse pas testimit me aparatin alkool-testues, rezultoi se drejtonte autobusin e linjës së Laprakës, në gjendje të dehur”-thuhet në njoftim.
Policia raporton se në një javë janë arrestuar 16 drejtues mjetesh dhe janë pezulluar 79 leje drejtimi për shkelje të rregullave të qarkullimit rrugor.
“Nga monitorimi me mjetet inteligjente, në akse të ndryshme të kryeqytetit:
-janë arrestuar në flagrancë 16 shtetas, 12 prej të cilëve pasi drejtonin mjetin përkatës, në gjendje të dehur; 2 të tjerë pasi drejtonin mjetin, pa leje drejtimi dhe 2 drejtues, për shkelje të tjera të rregullave të qarkullimit rrugor;
-janë pezulluar 79 leje drejtimi, 38 prej të cilave për tejkalim të normave të shpejtësisë; 31 për drejtim të mjetit, nën efektin e alkoolit dhe 10 leje drejtimi, për shkelje të tjera të Kodit Rrugor.”-thuhet në njoftim./Opinion.al
