Një 36-vjeçar që po transportonte 9 emigrantë të paligjshëm ka braktisur makinën dhe është larguar duke u shpallur në kërkim nga policia.
Mësohet se ai nuk i është bindur urdhrit të punonjësve të policisë për të ndaluar dhe pas ndjekjes nga ana e policisë braktisi makinën dhe u arratis, ndërsa mjeti u sekuestrua.
Policia i bëri shenjë ndalimi 36-vjeçarit me inicialet R. B., i cili po drejtonte automjetin tip “Mercedez Benz”, në aksin rrugor Gjirokastër-Tepelenë, në vendin e quajtur “Ura e Lumit”. Ai nuk i është bindur urdhrit të punonjësve të Policisë Rrugore për të ndaluar mjetin, të cilin e ka braktisur në vendin e quajtur “Virua”.
“Nga veprimet hetimore rezultoi se R. B. po transportonte 9 emigrantë të paligjshëm kundrejt fitimit”, njoftoi policia.
Materialet në ngarkim të shtetasit të mësipërm i kaluan Prokurorisë pranë Gjykatës së Shkallës së Parë Gjirokastër, për veprat penale “Mosbindja ndaj urdhrit të punonjësit të policisë” dhe “Dhënia ndihmë për kalim të paligjshëm të kufirit”./Opinion.al
