Teksa njoftoi se nga data 3 Korrik do të mbyllen sportelet e Kadastrës dhe se shërbimet do të kryhen nëpërmjet e-Albania, kryeministri Rama u ndal dhe te situata në Kadastrën e Vlorës ku janë ndërruar 9 drejtorë.
Gjatë fjalës së tij, kreu i qeverisë iu drejtua atyre që i cilësoi “ujqër” që të largohen nga Kadastra e Vlorës. Sipas tij, me dixhitalizimin e shërbimeve në Kadastër, nuk do të ketë më punë për ta.
“9 drejtorë kadastre janë ndërruar në Vlorë deri ditën kur unë i numërova. Pastaj hoqa dorë nga numërimi. Hoqa dorë dhe nga përpjekja si deputet i Vlorës duke u konsultuar me të gjithë se si mund të bëhet duke vënë një….Njëri më problem se tjetri. 9! Lajmi im për gjithë ata që i rrinë rrotull Kadastrës së Vlorës si ujqërit një preje është ikni se nuk ka më Kadastër për ju. Askush aty brenda nuk ju ndihmon dot më sepse atyre brenda në kompjutera do shfaqet Tropoja, Hasi, Durrësi, por nuk do shfaqet Vlora asnjëherë.
Nuk e di sa ju e ndjeni se çfarë ndjej unë kur them këto fjalë. Jemi të gjithë këtu përgjegjësit kryesorë për këtë situatë. Po fus dhe veten time megjithëse në këtë rast ka qenë rasti më evident kur unë kam kuptuar që s’ka pushtet njeri që mund ta bëjë punën që bën dixhitalizimi”, u shpreh Kryeministri Edi Rama.
