Zëvendëspresidentja e zgjedhur, e Shteteve të Bashkuara të Amerikës, Kamala Harris do të japë dorëheqjen nga vendi i saj në senat të hënën, dy ditë para se ajo dhe Presidenti i zgjedhur Joe Biden të inaugurohen. Kjo lëvizje do t’i japë fund mandatit të vetëm 4-vjeçar të saj si senatore e Kalifornisë.
Ndihmësit e Demokratit në Kaliforni konfirmuan se guvernatori i Kalifornisë, Gavin Newsom ishte në dijeni të vendimit të saj, duke i hapur rrugën atij që të emëronte në këtë pozicion demokratin Alex Padilla, që tani mban postin e sekretarit të shtetit të Kalifornisë, për të shërbyer dy vitet e fundit të mandatit të Harris, shkruan Associated Press.
Harris nuk do të mbajë fjalim lamtumire në senat. Ndërsa, senati nuk është planifikuar të mblidhet deri të martën, në prag të Ditës së Përurimit, dy javë pasi mbështetësit e Presidentit në ikje Donald Trump sulmuan Kapitolin ndërsa ligjvënësit po mblidheshin për të pohuar fitoren e Biden në zgjedhje.
Harris po bën histori pasi do të jetë gruaja e parë me ngjyrë dhe gruaja e parë me origjinë nga Azia Jugore që do të jetë Zëvendëspresidente e SHBA-së./Opinion.al
