Kjo ditë shënon Ditën Botërore për Parandalimin e Vetëvrasjeve.
Organizata Botërore e Shëndetësisë (OBSH), bëri me dije se afro 800,000 njerëz kryejnë vetëvrasje çdo vit në botë.
Teksa kërkonte veprime konkrete për parandalimin e tyre OBSH-ja tha se norma globale e vetëvrasjeve ka rënë në periudhën 2010-2016, por numri i vdekjeve ka mbetur i njëjtë, për shkak të popullsisë globale në rritje.
“Me gjithë përparimin, një person vdes çdo 40 sekonda nga vetëvrasja”, tha përmes një deklarate drejtori i përgjithshëm i OBSH-së, Tedros Adhanom Ghebreyesus.
“Vetëvrasjet janë të parandalueshme. U bëjmë thirrje të gjitha vendeve që të përfshijnë strategji të parandalimit të vetëvrasjeve në programet kombëtare të shëndetit dhe arsimit”, shtoi ai.
Sipas raportit vetëvrasja është shkaku i dytë kryesor i vdekjes tek të rinjtë e moshës 15-29 vjeç, ndërsa në mesin e adoleshentëve të moshës 15-19 vjeç, vetëvrasja është shkaku i dytë kryesor i vdekjes te vajzat dhe shkaku i tretë kryesor i vdekjes te djemtë.
Në raportin e OBSH-së thuhet gjithashtu se metodat më të zakonshme të vetëvrasjes janë varja dhe vetëhelmimi.
Shumica e vetëvrasjeve ndodhin në vendet me të ardhura të ulëta dhe të mesme, ku jeton shumica e popullsisë globale, por normat janë më të larta në vendet më të pasura.
