TIRANE- Sot bëhen 8 vite nga tragjedia e tmerrshme e Gerdecit, ku nga shpërthimi i fabrikës së demontimit të armëve humbën jetën 26 persona, dhjetëra të tjerë u gjymtuan, shtëpi të tëra u shkatërruar. Kjo ditë nuk është lënë pa permendur nga ministri i Brendshëm Saimir Tahiri. Ai ishte në një takim për konkurset në polici kur tha se një nga autorët ndodhët jashtë jashtë vendit, për të folur pikërisht për Reformën në Drejtësi.
“Por ne e dimë që ka nga ata që arrestohen nga policia e lirohen nga gjykata. Para pak ditësh denoncova një gjyqtar në Vlorë që kishte nxjerrë nga burgu një person që disa ditë më parë ishte arrestuar. Për këtë reagoi edhe një Unioni i Gjyqtarëve. Po pyesja veten, mirë gjyqtari që kishte mbase hallet e veta, por këta të unionit a kanë ndonjë kalendar”.
“Sot shënohen 8 vite nga një ngjarje që ka tronditur mbarë vendin, dhe sot një nga autorët është jashtë Shqipërisë për të folur për reformën në drejtësi dhe për dekriminalizimin. Unë respektoj çdo union gjyqtarësh, por nuk do ndaloj së denoncuari çdo gjyqtar që nuk shërben me dinjitet e ndershmëri për çdo qytetar”.
“Policia sot duhet të luftojë dy herë, njëherë për të arrestuar atë që thyen ligjin, e njëherë pasi e liron gjykata. Kjo është një betejë që mund ta fitojmë të gjithë bashkë. Reforma në Drejtësi është vetëm një pjesë e betejës që jemi të vendosur të ecim përpara. Por është një pjesë e rëndësishme të turpërojmë para të gjithëve ata që për dy dekada na sollën këtu”, tha ministri Tahiri.
