Qeveria shqiptare ka vendosur që të blejë dronë ushtarakë nga Turqia. Marrëveshja është konkretizuar ndërsa media turke “Yeni Şafak” shkruan se Shqipëria ka shpenzuar për blerjen e tyre 8 milionë euro.
Po ashtu media turke ka zbuluar për herë të parë edhe tipin e dronëve superinteligjentë, të llojit IHA dhe SİHA prodhuar nga “Baykar Defense” në Turqi që do të blejë Shqipëria. Bëhet fjalë për mjete që prodhohen në industrinë e mbrojtjes me armatim tip (SIHA) të cilët janë dronë të armatosur dhe dronë pa armatim tip (IHA).
Buxheti i qeverisë i ndryshuar në 22 qershor alokon fonde për Ministrinë e Mbrojtjes për këtë qëllim. Dokumenti i botuar nga parlamenti shqiptar në 23 qershor publikoi shumën e buxhetit të alokuar për dronet, shkruan media turke. Në dokument, shpenzimet u vlerësuan brenda fushës së marrjes së masave për rritjen e sigurisë kombëtare.
Ambientet e fabrikës ku prodhohen disa variante të droneve në fjalë, u vizituan gjatë këtij muaji nga ministri i Brendshëm, Bledi Çuçi. Në fillim të këtij muaji ai publikoi një video nga takimi me zyrtarë të kompanisë teksa vizitonte fabrikën.
Kujtojmë se ka qenë vetë kreu i qeverisë, Edi Rama, i cili gjatë vizitës në Stamboll në fillim të muajit qershor, njoftoi për blerjen e dronëve inteligjentë që do të shërbenin për monitorimin e territorit./Opinion.al
